القناعه كنز لا يفنى وحبك من قناعتي

القناعه كنز لا يفنى وحبك من قناعتي
وعظيم اللي قناعاته تجيبك يا أعز الناس


أدور من نهاية الوصل عمر لبداياتي
ولقيتك أعظم طيوف الغرام وغاية الاحساس


ولو إن الزمن ضدي وضدي بكل هقواتي
ولكن هالجسد من غير وصلك ما يعيش براس


وأنا لك من مضيت بحبري السايل ووناتي
على مهجت لقاك أبكيت حبري وأبكي القرطاس


رسمت من الوجود أعظم وجود وبس لا تحاتي
أمانه بس تعال وشف وجودك يا ذهب والماس


رثيتك في حضورك وإن بعدت أخاف لاتاتي
عظيمه هالمحبه دون حد ومالها مقياس


وجودي يا وجودي لك ويا أطهر معاناتي
من أيام الغرام اللي مضى لو قلتي لا باس


أعيشك في عيونن ما تخونك يا مسافاتي
وأعيشك رحلتن لو طولت في دربها هوجاس


وأحبك رغم تجريح الليالي فيك وآهاتي
وأحبك رغم حظن دون لحظات اللقا محتاس


وأحبك لو فشلت وعثرت اللحظه وحيلاتي
وأحبك لو يقولون الكرامه صعب ما تنداس


أدوس إمن الحياه أعظم خفوق وكل ما فاتي
براهينه تبرهن من هو الصادق من البلاس


وأنا لك كنت شمسن مشرقه في كل الاوقاتي
أموت إن جاء نهارك لجل أشوفك قبل كل الناس


وأنا لك روح ما تبخل ولا تقسى ولا تباتي
إذا انت بيومك الضيقه أشوف بوقتي الأتعاس


وأنا لك من كلام أهل العذل أقصر بجياتي
وأقول إنك ولد ذاك العرب وإنك عظيم الساس


وأروح أسهر مع طيات مقسومي وزلاتي
وأخبي ما خفا عن كل من هو للعذل عساس


وأقول إنك رساله خالده وأشرف شهادتي
خذيتك من صفوف ما درسها كود أبو نواس


وسام أغلى محبه مكسبك بآخر مساحاتي
وحروفك ما تموت بقلب محبوك ولا الكراس


وهذا موجز الفكره وهذي هي نهاياتي
أموتك حب والموته بمثلك لي ترى نبراس


وأقول الله يديمك لو بعيده منك خطواتي
وأقول الله يديم الناس لأنك من ضمن هالناس