يوميات بويه >> طالبكم بوسعود لاتردونه (مره خطير) القصه بليز اقروهـ

الى الغالين على قلبي اليوم جايبه لكم موضوع خاص اتمنى يعجبكم


الموضوع هو راح يكون لي يوميات بهالقسم
بس راح تكون اليوميات مختاره من حياتي
وراح اشوف رايكم فيها


اتمنى الكل يقراها للاخير لان جد تعبت وانا اكتبها

راح اتكلم عن مسيرة حياتي اليوم قبل يومياتي



عشت بداية حياتي مع احلى اثنين بحياتي
اللي هي امي وابوي
عشتها بكل مافيها من حنان وعطف ودلع واهتمام
لكن فجئه يتحول كل شي للعكس
تدرون ليه؟!
ابوي طلق امي اللي كانت تحمل جنسيه فرنسيه وبقيت بحضن ابوي الغالي اللي حاول قد مايقدر يعوضني الحنان بس تتوقعون حنان الام احد يقدر يعوضه
امي راحت بعيد عني وانا في سن احتاجها
كان عمري ثمان سنين
فقدت حضنها الدافي
فقدت قلبها الطيب


امي راحت عن عيوني
وراحت لمكان بعيد
مكان صعب اوصله
بقيت وحيده بهالدنيا
نسيت اني طفله كان عشقها لعبها
تخليت عن كل شي حلو بالدنيا
تركت اصحابي
تركت العابي
تركت اغلى احبابي
وفضلت الوحده
فضلت ابقى بغرفه ظلمه تحضني وتعوضني عن امي
لاكن للاسف
مالقيت اشكي الا لجدراني
وجبرت يدي الصغيره تكتب وهي تجهل الحرف وش يعني
عودتها
لين سطرت احزاني على دفتر دروسي
للاسف لمحت الدفتر معلمة صفي وقالت وش اللي تقصدينه
قلت اقصد
سهله الكبير يصبح صغير لاكن صعبه الصغير يصبح كبير
انا مابغى اعيش يومي
ابي سنيني تمر مثل الريح
ابي اصير كبيرت سن
وحقق حلمي
حلمي اني احتضن امي وانام على صدرها
واسترجع الذكرى يوم اني طفله
يوم كانت تنشد لي الين اغفى وادفى بحضنها

ماراح انسى الغالي
اللي حاول يطلعني من اللي انا فيه
حاول بكل الطرق يكون لي الاب والام وكل شي بالدنيا
عطاني كل مايملك علشان يرضيني
بعد فتره نساني حضن امي
صرت مجنونه فيه
مااقدر استغنى عنه
لو يخيروني بينه وبين امي راح اختاره هو
بجد مو بس كلام ابوي اللي ضحى بحياته علشاني
اشياء كثيره لو اذكرها ماراح اوفيها

تبون تعرفون السبب اللي خلى امي تنفصل عن ابوي ؟
هو انا !
ادري تقولون ليه انا السبب !

راح اقولكم ليه
امي ديانتهامسيحيه
كنت اشوفها وكنت احسبها اللي توسيه عادات لازم اسويها
كنت اطبق اللي تسويه
فالاكل ابوي يقول بسم الله وامي تشكر النعمه بطريقة مختلفه جدا عن ابوي
كانت تلفت نظري الحركه اللي كانت امي تسويها واقلدها
فجئه
اسمع صرخه من ابوي يقولي لاتسوين كذا
امي تقوم من الاكل وهي متضايقه فانا ازعل ليه يزعل امي
ابوي يقولي صلي كذا
امي تقولي لا صلي كذا
ابوي يمسك السبحه بيده ويستغفر
امي تمسك الص.. بيده
انا بهذا السن وش عرفني الصح من الغلط
صرت ضايعه بين امي وابوي
ليه ماتفقو على ان تكون لي ديانه محدده ؟
ليه خلوني اجهل كل تصرف يصير قدامي؟
ليه كل واحد يجبرني على شي انا ماعرفه ؟

هل السبب مني يوم ابوي طلق امي علشان اكون مثل ديانته ؟!
ليه اكتشفت ان اللي اسويه اكبر غلط ؟
ليه حسسوني بالذنب وانا بعمر صغير؟

------------------------------------



بعد كم سنه من طلاق امي مرض ابوي بمرض السرطان
اللي كنت ماعرف وش سالفته
كان عايش معاي الغالي
واشوف الالم بعيونه ويوم اسئله يقول انا بخير يابنتي
كنت اشوف بعيونه الحزن ويوم اسئله يقول انا اسعد انسان انا كنت اشوفه عيونه تحكي لي وهو ساكت
كنت اشوف فعيونه الامل فيني
في هذي الفتره كنت اجلس معه ساعه
يحكي لي عن الدنيا
كان يعلمني الخطا من الصح
كان يعطيني القوه قبل مايتركني لدنيا
عطاني كلمه باقيه براسي الين اليوم
كان يقول: بنتي انتي اليوم اشوف فيك الامل لبكره
ابغاك تكونين اقوى من الظروف
ابغاك تتحدين الزمان
ابغاك تملكين حياتك وتمشينها على كيفك
ابغاك تعيشين الحظات بسعاده حتى لو كانت حزينه
ابغاك تواجهين الحياه بكل طاقه تملكينها
ابغى الكل يقول اني جبت بنت عن عشرة رجال
ابغى يوم تغمض عيوني اغمضها وانا مرتاح
ابي ارحل واشوف الضحكه بعينك
وعدت ابوي وانا اضحك وداخلي خوف
خوف من الزمان اللي راح ااعيشه بدون اعز اثنين
بدون السند اللي كان حاميني
واخر يوم له كان يوصيني وهو على فراشه
وانا كنت جنبه وماسكه يدينه وابكي لاني حاسه راح افقده
ابوي : يابنتي ليه تبكين كل ماشفتك
تكفين لاتبكين وانا معك وحي
اجل يوم اكون في قبري وش بتسوين
انا: تكفى بطلبك ياابوي لاتخليني يبه مالي غيرك فالهدنيا
يبه لجل عيونك انا حيه يبه من فتحت عيني على الدنيا وانت ماتخليت عني ولا لحظه يبه كيف بعيش فالدنيا وانت مو فيها
ابوي والتعب هالك جسمه:ايمي تكفين ضميني هااتي همك في وسط جوفي وصبـيه
اناضميته وقلت: ياحنـون القلـب ياتاجـي وعـزي أوعدك ياابوي ماانساك لو عمري نسانـي
ابوي :ايمي اذا ربي كتب لي عمر والله لأنزع همومك وأطوقـك بحنانـي مابي يوم خاطرك يتكدر ولا بهمك تعاني
انا: يابوي انا مابغى غير قربك لي
ابوي: ايمي تكفين خلك هنا يمكن الروح تروح وانا عيني ماارتوت منك خلي عيني تختم نظرها فيك خلي اخر نفس اتنفسه هو انتي
فجئه ابوي عيونه تناظر الباب يقول : يابنتي الله يحفظك انتي بامان الله
انا: يبه تكفى طالعني
ابوي : يابنتي خلاص راحت على
انا: يبه كيف راحت عليك
ابوي روحه طلعت قدامي وهو يتشهد راحت روحه وانا ارتجيه ينظر لي
صرت اهزه جسمه اللي صار ذبلان من المرض وانا اصرخ يبه تكفى لاتخليني يبه افهني تراك ان مافهمتني مافي احد بالهدنيا بيسمعني يبه خليك جنبي ترى الاطماع تتبعني يبه ابي حضنك الا من ضاقت الدنيا تحضنيي يبه ارتجيك تاخذ روحي بس لاترحل وتتركني يبه بسمتك عندي الا من ضقت تكفيني
صرت ابكي على صدره وصارو اللي حولي يهدوني ويعزوني يغطون ابوي قدامي صرت اصرخ باعلى صوتي
يبه صار الناس يعزوني يبه انت ماممت انت حي انت حي بقلبي
راح اتذكرك في كل لحظه يبه انت كنت لي الروح اللي تعيش بجسمي
يبه كنت لي الشمعه اللي تضوي لي حياتي

الممرضه صارت تشيل الاجهزه وبعدين خذو ابوي وانا اقول لبوي اخر كلام
يبه وين بيكون مصيري؟
وين اروح يبه بعد ماطلع من هالمكان ؟

راح ابوي من عيوني ولا سمعت جوابه

ارتميت بالارض
وبكيت مثل الطفل يوم يرتجي من يشيله

الله يرحمك يالغالي ويسكنك فسيح جناته

-------------------------------

(فقدت ابوي وانا بالصف الثاني متوسط
امي راحت عني وابوي راح عني ومابقى لي غير جدتي وعمي
اللي كل ماشفاتني صارت تبكي على حالي )
اه صرت يتمية الاب والام
يالقهر يتيمه كنت اسمعها واليوم اتذوقها كم قويه هالكلمه بعيني
صدق صعب ترجع انسان ميت بس موصعب توصل انسان بعيد
علشان كذا انا قررت اني اعيش مع امي حتى لو كانت باخر الكون
تركت جدتي وعمي وصديقاتي وتركت البيت اللي كان يحتضن اجمل ذكرى للغالي قررت اني ارحل واتغرب لجل انطق كلمة امي واحتضنها



-----------------------------------


بفرنسا
( عيشو اللحظه يوم تكونون في مكان اللكل يجهلك)

غريبه عند الكل عند زوج امي عند اخواني الاربعه خالاتي
حتى بالمدرسه كنت شخص غريب حاولت اتأقلم مع اللي حولي بس كانت صعبه جد صعبه
بعد فتره حسيت اني بديت اني اخذ على الوضع اللي كان فرق بين حياتنا بالسعوديه وبين فرنسا من ناحية العادات والتقاليد والتفكير وكل شي تقريبا
مر كم شهر علي وانا عند امي اللي حاولت تعوضني عن السنين اللي كانت بعيده عني عطتني اهتمام كبير لدرجه اخواني صارو يغارون
وزوجه روبرن اللي مراح اسامحه طول عمري اللي الين اليوم ادعي عليه !!
اللي بعدني عن حضن امي
راح اقولكم ليه
هو صدق يحبني بس للاسف حبه لي كان راح يضيعني كنت الاحظ عليه حركات مو طبيعيه بس الاخ تمادى كثير لين حاول انه يضرني بس ربي ستر وماقدر يمسني باي شي
بعد اللي صار صرت افكر كثير
الخوف محاصرني حسيت مافي امان
تغيرت نظرتي للكل
صرت اشوف اللي حولي وحوش
صرت اجهل تصرفاتي
امي لاحظت مني هذا الشي وجات كلمتني
طبعا كان الكلام بالفرنسي
امي : ايمي انا ابغى اتكلم معك في موضوع
انا: ايش
امي : انتي بنتي واخاف عليك كثير واتمنى تسمعين نصيحتي
( كنت في وقتها سعيده ان امي فهمت اللي بداخلي سعيده لاني كبرت على هذي الدنياو ماسمعت نصيحه من امي واليوم اسمعها تنصحني)
انا: قولي اسمعك
امي : ايمي انتي هذي الفتره تغيرتي كثير انتي مو ايمي اللي اعرفها ايمي اللي قلبه كبير متسامحه محبوبه عند الكل
انا: امي انا ماشوف اني تغيرت بس انا امر بظروف وراح تعدي
امي : بس الظروف ياايمي خلتك انسانه عدوانيه
(انصدمت من امي من كلمتها
انا: انا عدوانيه
امي : ايمي لاتزعلين بس انا هذا اللي شفته حتى زوجي يقول كذا
انا: طيب ليه ماسالتيه
امي: ليه اساله
انا: لان يمكن يكون هو السبب في اللي انا فيه
امي : ايمي لا تتكلمين بالالغاز
انا: انا مابغى اتكلم واخرب حياتكم انا من عشت عندكم احس سببت لكم التوتر والمشاكل
امي: بالعكس انتي من جيتي سويتي جو ثاني بس هذي الفتره تغيرتي
انا: خلاص انتي عطتني بما فيه الكفايه وانا اشكر على كل شي قدمتيه لي وسامحوني كلكم اذا ضايقتكم وكنت ثقيله بس حبيت اقولك انا قررت ارجع لسعوديه
امي تحاول تمنعني اني ماتكلم
امي: ايمي لاتقولين كذا انا يوم شفتك رجعت لي روحي
انا كنت عايشه في هم لانك بعيده عن عيوني انتي لي
انتي ملكي انا جبتك وتعبت فيك لاتحرميني مررره ثانيه مثل مابوك حرمني منك
حرمني من اني اشوفك تكبرين قدامي
(وانا طول الوقت ابكي موقادره اتكلم
امي: ايمي انا كنت اتعذب لما اشوف اخوانك يكبرون قدامي وانتي مو بينهم
انا: امي انتي مالك ذنب باللي يصير سواء اللحين او بعدين وهذا قراري وجد سامحيني
امي : طيب ايش السبب اللي خلاك تتخذين هذا القرار

بعد محاولات من امي
انا: راح اقولك بس ماابغاك تفهميني غلط
امي:اكيد
انا: انا عشت معاكم فتره ماشفت منكم الا كل خير لاقيت الحب والحنان والاستقرار حتى من زوجك بس للاسف روبرن تحرش فيني
امي: لا تقولين كذا
انا: ماما انا عارفه انك راح تقولي كذا بس انا كبيره واعرف الغلط
امي: هذا مثل ابوك ومستحيل في يوم يضرك
انا: ماما روبرن كم مره حاول يعتدي علي نظرته لي تصرفاته غير اللي تقولينه انا احس عايشه في خوف انا معك ياماما اوبدونك انا راح احمي نفسي ولا راح اسمح لي اي احد يمسني ماما اذا هذا الشي يرضيك انا مايرضيني

حاولت بكل الطرق افهم امي بس للاسف صدقت حبيب القلب ابو عياله وكذبتني وقالت لي لاعاد تتكلمين بهذا الموضوع)

انا: ماما سوري اني شكيت لك اوضايقتك توقعتك بتوقفين معاي وبتحميني بس اكبر غلط اني قلت لك لاني لو ماقلت لك كنت بحط الامل فيك وبحتمي فيك
امي : ياايمي لاتفهمين غلط واسمعي انا ماامنعك من اي قرار تتخذينه لانك كبيره وعقلك براسك
انا: اوكي انا خلاص ابغى ارجع السعوديه
امي: انتي تعبانه شوي وخذي لك فتره تفكرين فيها
انا: امي انافكرت كثير قبل ماقول وانا مراح اتراجع


المهم دقيت على جدتي وقلت لها خلي عمي يحجز لي انا برجع السعوديه طبعا جدتي كانت تبي تعرف السبب فانا ماصدقت اقول حق احد لان من جد مالقيت احد يفهمني فايوم عرفت جدتي قالت بكرا عمك يحجز لك وترجعين السعوديه

بالمطار
ودعت امي ودعت عزاي الثاني
جد انا اليوم يتيمه
يتيمة الاب والام

بالمطار ..اناظر في عيون امي اللي مراح اشوفها بعد اليوم لاني وعدت نفسي اني اعيش حياتي لوحدي

نظرت لامي نظره اخيره وانا دموعي تنزل مو قادره اناظرها دموعي ملت عيني

عمي يسحبني يالله تاخرنا

وانا اقول بااعلى صوت تكفون خلوني اشبع من شوف امي

كان الكل يناظرني وانا كنت في وقتها نسيت اللي حولي

مشيت من المكان واحس اني قتلت امي بيديني

سمعت كلمات من امي وانا ماشيه اذكرها بكل حرف انطقته كانت تتكلم بصوت عالي
ايمي لاتنسين امك اللي تحبك

انسي انك كنتي هنا

اتذكريني يوم كنتي صغيره
لما كنت اسعدك
وانسي انك التقيتي فيني وانتي كبيره
لاني ماقدرت اسعدك

حاولت مااطالعها لاني جد كلاماتها اثرت فيني واذا شفت عيونها راح اتراجع وابقى معاها

ركبت الطياره وانا اشاهق مو قادره امسك نفسي عمي يحاولو يهديني

طول مانا بالطياره مانمت ولا لحظه
كنت افكر بحياتي وش راح اسوي
اذا انا عند امي ماحسيت بالامان
مين راح احس عنده بالامان
عمي اللي يبغى اكون عنده علشان الفلوس اللي عندي
عمي اللي يفكر بنفسه ونسى بنت اخو اللي محتاجه لانسان يحميها
عمي اللي قال لي انتي من اليوم ورايح راح تعيشين على كيفي
عمي اللي ذقت منه الويل
انا اليوم راح اتخلى عن انوثتي
انا اليوم اعلنت اكون اقوى من اي انسان
انا اليوم راح اكون شخصيه غير اللي داخلي
انا اليوم راح اوقف قدام الكل واثبت لهم اني اقدر احمي نفسي واني اقدر اربي نفسي بنفسي انا من اليوم بوسعود وحد يقدر يوقف قدامي



ثالث متوسط
عشت مع جدتي اللي ادعي لها من كل قلبي واقول الله لايحرمني منها
لولا الله ولولاه كان انا ضايعه فهالدنيا

بس للاسف احاول ارجع بنت نعومه لاكن ابو سعود راكب راسي

سوري على الاطاله
واتاسف على مشاركتكم همومي
حاولت اختصر قصتي قد مااقدر
اتمنى وصلت لكم معاناتي الا خبيتها طول السنين

بس حبيت اقولكم انا اللحين عمري 20 سنه ادرس بجامعه باليابان وهذي لي ثاني سنه وعندي اجازه يعني متفرغ للمنتدى


راح انزل قصص جدا مختلفه عن اللي قريتوها راح تعيشون جو خبال جو ايام الثانوي فديتكم والله

ابغى اشوف ردودكم يالغالين والتفاعل

منقوله

بنت اسياد كتب:

يسلمووووووووووو ع قصة رائعه
بانتطار جديدك

الله يسلمك ياقلبي


اوكي راح انزل انشالله

خيال العاشقين كتب:

يعطيك العافيه
حلووووه كثير
وااصلي تألقك
ودي

تسلمين ياقلبي